Date: 13 Lún 2025
Ár mBunús le Fiosrú le linn Sheachtain na hOidheachta
Le breis is 100 imeacht ar siúl mar chuid de Sheachtain Náisiúnta na hOidhreachta i gContae Dhún na nGall, is deis iontach í seo do dhaoine an oidhreacht - idir nádúrtha, thógtha, chultúrtha agus seandálaíochta atá mórthimpeall orainn a fhiosrú. Beidh Seachtain Náisiúnta na hOidhreachta ar siúl idir an Satharn 16 Lúnasa agus an Domhnach 24 Lúnasa agus tá saorchead isteach ag formhór na n-imeachtaí. Tá clár iomlán na n-imeachtaí ar fáil ar líne ag www.heritageweek.ie
“Is é téama na bliana seo ná Ár mBunús a Fhiosrú agus iarrtar ar gach duine ár n-oidhreacht agus ár ndúchas ar a bhfuil ár bpobail, ár gcultúir agus ár dtírdhreacha tógtha, a fhiosrú” a mhínigh Joseph Gallagher, Oifigeach Oidhreachta Chontae Dhún na nGall. “Tá clár imeachtaí suntasach beartaithe ar fud an chontae arna eagrú ag eagraíochtaí oidhreachta, ag grúpaí pobail agus ag daoine aonair – cuid mhaith acu sin ar bhonn deonach. Is mar gheall ar a ndúthracht, a ndíograis agus a n-iarracht a mbíonn rath iontach ar Sheachtain na hOidhreachta i gContae Dhún na nGall.
I measc na n-imeachtaí a bheas ar siúl, beidh tithe oscailte den oidhreacht thógtha, léirithe ar scileanna agus ar cheardaíocht thraidisiúnta, siúlóidí treoraithe, cuairteanna ar shuíomhanna oidhreachta, turais allamuigh, taispeántais, cainteanna, ceardlanna, turais báid, turais bus, athléirithe stairiúla, seoltaí, ceol traidisiúnta agus gníomhaíochtaí do pháistí. Tá breis is 20 imeacht eagraithe nó páirtmhaoinithe ag Rannán Cultúir Chomhairle Contae Dhún na nGall lena n-áirítear an Oifig Oidhreachta, an Oifig Bithéagsúlachta, an Músaem, na Cartlanna, an tSeirbhís Leabharlainne, an Oifig Ealaíon agus an tIonad Cultúrtha Réigiúnach.”
“Is féidir imeachtaí a chlárú suas go dtí tús na Seachtaine Oidhreachta, coinnigh súil mar sin ar shuíomh gréasáin Sheachtain na hOidhreachta nó ar na nuachtáin áitiúla le haghaidh tuilleadh sonraí faoi imeachtaí i do cheantar. Ar shuíomh gréasáin Sheachtain Náisiúnta na hOidhreachta is féidir leat cuardach a dhéanamh de réir ceantair agus de réir lae ionas gur féidir leat do chlár taistil do Sheachtain na hOidhreachta a phleanáil. Is féidir le lucht eagraithe na n-imeachtaí do Sheachtain na hOidhreachta i nDún na nGall, earraí brandáilte Sheachtain Náisiúnta na hOidhreachta a bhailiú saor in aisce ó Mhúsaem an Chontae, An Bóthar Ard, Leitir Ceanainn. Áirítear leis seo veisteanna sofheicthe, t-léinte, hataí agus bratacha.”
Beidh téama i gceist roinnt laethanta le linn na seachtaine fosta. Beidh Doirse Oscailte na hOidhreachta ar siúl Dé Sathairn, 16 Lúnasa agus Dé Domhnaigh, 17 Lúnasa agus beidh idir áiteanna sibhialta agus stairiúla ar oscailt don phobal saor in aisce. Beidh roinnt imeachtaí ar siúl i nDún na nGall mar chuid de Dhoirse Oscailte na hOidhreachta. Beidh Lá na Leanaí Fiáine ar siúl Dé Sathairn, 23 Lúnasa, ina spreagtar páistí agus teaghlaigh leis an chuid is fearr a bhaint as a bheith amuigh faoin aer agus le sult a bhaint as an oidhreacht agus as an bhithéagsúlacht ina ndúiche féin agus lena bhfiosrú. Beidh Lá Oidhreachta an Uisce ar siúl ar an Domhnach, 24 Lúnasa, ina ndéantar ceiliúradh ar uisce na hÉireann, ar ár gceangal leis an uisce agus ar an dóigh ar mhúnlaigh an fharraige, na haibhneacha, na lochanna agus na bogaigh ár stair agus ár n-oidhreacht.
Is cuid lárnach de Laethanta Eorpacha na hOidhreachta í Seachtain Náisiúnta na hOidhreachta agus deántar ceiliúradh uirthi i mbreis is 40 tír ar fud na hEorpa. Is iad an Oidhreacht agus an Ailtireacht atá mar théama i mbliana. Déanann an Chomhairle Oidhreachta agus Oifigigh Oidhreachta na nÚdarás Áitiúil comhordú ar Sheachtain Náisiúnta na hOidhreachta le tacaíocht ón Roinn Tithíochta, Rialtais Áitiúil agus Oidhreachta.
Tá sonraí iomlána agus an t-eolas is deireanaí le fáil ar shuíomh gréasáin Sheachtain Náisiúnta na hOidhreachta: www.heritageweek.ie
