Date: 07 Lún 2025
‘Bród Ní Claontacht’- tionscadal de chuid PEACEPLUS seolta ag Tionscadal an Lucht Siúil i nDún na nGall
Tá “Bród Ní Claontacht” - an dara tionscadal de chuid PEACEPLUS, seolta go hoifigiúil ag Tionscadal an Lucht Siúil i nDún na nGall, i gcomhpháirtíocht le Comhairle Contae Dhún na nGall, le hinfheistíocht de €80,000. Tá sé maoinithe tríd an Chlár PEACEPLUS le tacaíocht ó Chomhlacht na gClár Speisialta AE (SEUPB). Is cuid de Phlean Gníomhaíochta Áitiúil Dhún na nGall é an tionscadal seo atá á chur i bhfeidhm faoi Théama 3: Meas ar Gach Féiniúlacht Chultúrtha a Mhéadú. Mar chuid den phlean leathan, cuirfear €7.6 milliún ar fáil chun 32 tionscadal cothaithe síochána a chur i bhfeidhm idir 2025 agus 2027.
Is tionscadal cuimsithe sóisialta trasphobail agus trasteorann é “Bród Ní Claontacht” ina gcuirfear béim ar an chaidreamh idir an Lucht Siúil, na Romaigh, na pobail Mhionlaigh Eitneacha Gorma agus tromlach an daonra, a athrú.
Mar chuid den chlár, cuirfear oiliúint ar fáil a bhfuil géarghá léi, a dhíreoidh ar idirdhealú, ar chiníochas agus ar chlaontacht a aithint agus an dóigh le dul i ngleic leo. Beidh breis is 110 rannpháirtí idir óg agus fásta ó cheantar bardais Leitir Ceanainn-Bhaile na nGallóglach páirteach ann. Reáchtálfar ceardlanna agus imeachtaí a thacóidh le Plean Straitéiseach Thionscadal an Lucht Siúil i nDún na nGall 2021-2026. Déanfar ceannairí pobail atá ag teacht chun cinn a chumasú leis na huirlisí agus leis an muinín atá de dhíth chun athrú dearfach a chothú.
Mhol Cathaoirleach Chomhairle Contae Dhún na nGall, an Clr Paul Canning, fís agus tionchar féideartha an chláir, ag cur béime ar an ról atá ag an chlár ó thaobh tuiscint, cuimsiú agus comhoibriú níos fearr a chothú i measc pobal: “Is sampla cumhachtach é ‘Bród Ní Claontacht’ den dóigh gur féidir linn síocháin a chothú, dúshlán a thabhairt don chlaontacht, agus sochaí níos cuimsithí a chruthú trí rannpháirtíocht fhiúntach agus trí fhoghlaim chomhroinnte a spreagadh.”
Thug an t-aoichainteoir David Friel ó Ollscoil Teicneolaíochta an Atlantaigh (OTA) Leitir Ceanainn óráid spreagúil, agus tharraing sé aird ar an tábhacht a bhaineann le rannpháirtíocht chuimsitheach ón phobal. ‘Is céim i dtreo contae níos cuimsithí agus tír níos cothroime a bhaint amach é ‘Bród Ní Claontacht’ ina mbeidh an todhchaí ag díriú ar bhród agus ní ar bhuaireamh’.
Dúirt an Clr Paul Canning ‘Samhlaigh pobal ina mbíonn comhoibriú ar bun idir daoine ó gach cúlra — cultúrtha, eitneach, glúin nó geografach — iad ag obair as lámha a chéile, ag foghlaim óna chéile, agus ag cruthú rud inteacht atá níos fearr agus níos láidre. Sin an fhís atáimid ag iarraidh a bhaint amach i nDún na nGall’.
D’éirigh go hiontach leis an seoladh, agus bhí dearfacht agus tacaíocht le brath go láidir ann. I measc lucht freastail na hócáide bhí baill foirne ó Thionscadal an Lucht Siúil i nDún na nGall agus ó Tionscadal na Romach, baill foirne PEACEPLUS ó Chomhairle Contae Dhún na nGall, an Clr Declan Meehan, agus ionadaithe ó eagraíochtaí pobail a bhfuil baint acu leis ar nós Seirbhís Óige Dhún na nGall agus Comhghuaillíocht Idirchultúrtha Dhún na nGall.
