Date: 15 Noll 2025
Beathaisnéis Néill Mhic Giolla Bhrighde seolta go Digiteach
Bhí an Hub ar an Chraoslach lán go doras oíche Déardaoin seo a chuaigh thart nuair a rinneadh ceiliúradh agus comóradh ar Niall Mac Giolla Bhrighde.
Feirmeoir as an Fhaiche Mhór, An Craoslach a bhí ann agus rinne Pádraig Mac Piarais ionadaíocht dó sa Chúirt in 1905 nuair a gearradh fíneáil air de bharr go raibh a ainm scríofa i nGaeilge aige ar a charr.
Scríbhneoir agus cumadóir amhrán a bhí ann agus ba é a chum leithéidí ‘Mo Chró Beag ag bun Chnoc a’ Tí’ agus ‘Noreen Bawn’.
Sheol Seirbhís Leabharlainne Dhún na nGall leagan digiteach de bheathaisnéis Néill ar an oíche.
Ag labhairt dó ag an ócáid, leag Cathaoirleach Choiste na Gaeilge, an Clr Micheál Choilm Mac Giolla Easbuig béim ar thábhacht na Gaeilge agus mar a spreag saothar Néill Mhic Giolla Bhrighde gníomhaíochas teanga - fiú sa lá atá inniu ann.
Mhaígh sé go bhfuil féidearthacht ann closleabhar a fhorbairt dóibh sin a bhfuil deacracht sa léitheoireacht acu.
Lena chois sin, ghabh sé buíochas le daltaí Scoil an Ghlasáin a cheol ‘Mo Chró Beag ag bun Chnoc a’ Tí’ agus roinnt carúl Nollag i nGaeilge.
Rinne Cathaoirleach Cheantar Bardasach na nGleanntach, an Clr Michael McClafferty an leagan digiteach den leabhar a sheoladh go hoifigiúil. Tá sé le fáil ag an nasc thíos:
Dúirt sé: “Rinne Niall Mac Giolla Bhrighde an-obair ar son na Gaeilge agus ba chóir dúinn aitheantas a thabhairt d’achan rud a bhain sé amach ina shaol mar scríbhneoir agus gníomhaí teanga.
Ba mhaith liom buíochas a thabhairt do Majella McFadden agus pobal an Chraoslaigh a chuir fáilte romhainn ag an ócáid speisialta seo.
Go raibh maith agat Michelle Nic Pháidín, OPT le LPT Thuaisceart Dhún na nGall a oibríonn go dian leis an Ghaeilge a chur chun cinn sa cheantar.
Buíochas do Sheirbhís Leabharlainne Dhún na nGall as an obair a rinne siad an leabhar iontach seo a chur ar fáil saor in aisce dúinn.”
Rachaidh an leabhar chun tairbhe go mór do mhuintir Dhún na nGall agus do lucht léinn ar fud an domhain a mbeidh fáil acu ar an acmhainn seo.
Sheol Cumann Pobail an Chraoslaigh leabharlann bheag phobail ar an oíche chomh maith. Bhí garnia le Niall Mac Giolla Bhrighde, Aodhán Ó Cinnéide i láthair le plaic chuimhneacháin in ómós dá sheanuncail a nochtadh.
Bhí an ócáid seo eagraithe ag Seirbhís Leabharlainne Dhún na nGall i gcomhpháirtíocht le LPT Thuaisceart Dhún na nGall agus Cumann Pobail an Chraoslaigh.
