Date: 17 Noll 2025
Maoiniú ar fáil le haghaidh séadchomharthaí seandálaíochta i nDún na nGall
Tá Comhairle Contae Dhún na nGall ag glacadh le hiarratais maidir le caomhnú séadchomharthaí seandálaíochta, chuig Ciste na Séadchomharthaí Pobail go dtí 4pm Dé hAoine 30 Eanáir 2026. Tá maoiniú suas le €100,000 ar fáil fá choinne deisiúcháin riachtanacha agus oibreacha caipitil chun séadchomharthaí seandálaíochta a chaomhnú agus a chóiriú (Sruth 1), suas le €30,000 fá choinne Pleananna Bainistíochta Caomhnaithe nó tuairiscí a dhírítear ar bhearta a aithint chun séadchomharthaí seandálaíochta a chaomhnú agus chun rochtain phoiblí a fheabhsú (Sruth 2) agus suas le €30,000 chun rochtain agus bailchríoch a fheabhsú ag séadchomharthaí seandálaíochta lena n-áirítear rochtain ar líne nó rochtain fhíorúil (Sruth 3). Is tionscnamh de chuid Sheirbhís na Séadchomharthaí Náisiúnta sa Roinn Tithíochta, Rialtais Áitiúil agus Oidhreachta i gcomhpháirt le húdaráis áitiúla é Ciste na Séadchomharthaí Pobail.
“Bronnadh breis agus €1.17 milliún ar ocht gcinn déag de shéadchomharthaí seandálaíochta i gContae Dhún na nGall faoi Chiste na Séadchomharthaí Pobail ó tugadh isteach é in 2020” a mhínigh Joseph Gallagher, Oifigeach Oidhreachta Chontae Dhún na nGall. “Soláthraítear maoiniú 100% trí Chiste na Séadchomharthaí Pobail d’úinéirí príobháideacha, caomhnóirí, coistí pobail agus údaráis áitiúla chun séadchomharthaí seandálaíochta agus suíomhanna stairiúla a chaomhnú, a chothabháil, a chosaint agus a chur i láthair. Gach séadchomhartha a mhaoinítear faoin scéim seo, is scéim faoi chosaint í faoi Acht na Séadchomharthaí Náisiúnta. An chuid is mó den 3,400 suíomh seandálaíochta a bhfuil eolas orthu i gContae Dhún na nGall is suíomhanna iad atá faoi úinéireacht phríobháideach nó faoi chaomhnú príobháideach, agus ar an ábhar sin tugann an scéim seo deis iontach d’úinéirí talún, coistí pobail agus údaráis áitiúla oibreacha caomhnaithe a dhéanamh ar shéadchomharthaí, cur leis an rochtain atá ag daoine orthu, an chuma atá orthu a fheabhsú nó cur le seasmhacht na séadchomharthaí le go dtig leo tionchar an athraithe aeráide a sheasamh”.
Beidh go dtí lár mhí Dheireadh Fómhair ag na hiarratasóirí rathúla an obair a chur i gcrích agus beidh comhairle agus tacaíocht ar fáil d’iarratasóirí ó Oifig Oidhreachta Chomhairle Contae Dhún na nGall agus ó Mhúsaem an Chontae maidir le cur i bhfeidhm na dtionscadal seo sna míonna amach romhainn. Tá tuilleadh eolais agus foirmeacha iarratais ar fáil ar shuíomh gréasáin Chomhairle Contae Dhún na nGall ag www.donegalcoco.ie/heritage. Más mian leat a fháil amach cé na séadchomharthaí seandálaíochta a bhfuil eolas orthu i do cheantar féin, is féidir leat féachaint ar shuíomh gréasáin Sheirbhís na Séadchomharthaí Náisiúnta ag www.archaeology.ie. Sula ndéanfar aon obair ar shéadchomhartha náisiúnta, nó fiú in aice lena leithéid, is gá toiliú a fháil roimh ré ó Sheirbhís na Séadchomharthaí Náisiúnta. Más úinéir nó caomhnóir ar shuíomh seandálaíochta nó ar shuíomh stairiúil thú, nó má tá tú páirteach i gcoiste pobail ar mhaith leis an oidhreacht seandálaíochta áitiúil a chaomhnú, tá comhairle ar fáil ó Oifig Oidhreachta Chontae Dhún na nGall ar ríomhphost ag cmf@donegalcoco.ie nó ar (074) 917 2576.
