Date: 24 Feabh 2025
Mórghradam Chumann Chomhaltaí na gComhairlí Contae (LAMA) bronnta ar Chomhairle Contae Dhún na nGall
Bronnadh an mórghradam ‘Comhairle na Bliana’ ar Chomhairle Contae Dhún na nGall ag Gradaim Uile-Éireann Phobail agus Chomhairle LAMA na bliana seo.
Is tagarmharc feabhais iad Gradaim LAMA a thugann aitheantas agus a dhéanann ceiliúradh ar an chomhoibriú a bhíonn ar bun idir pobail agus na comhairlí. D’éirigh leis an Chomhairle ‘Údarás Áitiúil na Bliana’ a bhaint amach ag Gradaim na nÚdarás Áitiúil de chuid Chambers Ireland ag deireadh 2024.
Bhí searmanas bronnta na ngradam LAMA ar siúl tráthnóna Dé Sathairn (22 Feabhra) in óstán an Rochestown Park Hotel, Corcaigh.
Lena chois sin, bhí an bua ag an Chomhairle in dhá rannóg; “Tionscadal Cumarsáide is Fearr” – An Feachtas Dún na nGall Abú, de bharr cur chuige an fheachtais a théann i bhfeidhm ar go leor, is é sin féiniúlacht Dhún na nGall a léiriú, rannpháirtíocht an phobail a chur chun cinn agus fás eacnamaíoch a chothú. D’éirigh leo sa rannóg “An Gnó is Fearr a oibríonn leis an Phobal” – Spraoi agus Spórt fosta, is fiontar sóisialta é seo atá ag teacht chun cinn i gCarn Domhnach a dhéanann athinfheistíocht ar an bhrabús a dhéanann siad ar mhaithe leis an phobal agus le fás eacnamaíoch a spreagadh. Bhain an Chomhairle an gearrliosta amach i sé rannóg eile.
Rinne Cathaoirleach Chomhairle Contae Dhún na nGall, an Clr Niamh Kennedy agus Príomhfheidhmeannach na Comhairle John McLaughlin ionadaíocht ar Chomhairle Contae Dhún na nGall ag an searmanas bronnta. Bhí lúcháir mhór ar Bhaill Thofa agus ar fhoireann na Comhairle an gradam seo a fháil ar son an chontae.
“Tá áthas orm gur bronnadh mórghradam eile ar Chomhairle Contae Dhún na nGall. Léiríonn sé seo an obair mhór mhaith a dhéanann Comhairleoirí agus foireann na Comhairle lá i ndiaidh lae ar son an phobail, iad ag forbairt tograí agus tionscadal nuálach le borradh a chur faoi na gnéithe sóisialta, cultúrtha, comhshaoil agus eacnamaíochta a bhaineann le saol an phobail i nDún na nGall. Ba mhór an onóir é bheith i láthair ar an oíche agus ár gcontae i mbarr réime”, a dúirt an Clr Kennedy.
Chuir Príomhfheidhmeannach Chomhairle Contae Dhún na nGall John G McLaughlin fáilte roimh an Ghradam seo agus dúirt “is léiriú iontach é seo ar obair na Comhairle. Is ceiliúradh é ar chaidreamh uathúil agus siombóiseach a bhaineann Comhairle Contae Dhún na nGall agus an pobal sásamh as. Lena chois sin, tugann sé léargas dúinn go gcothaíonn an comhoibriú a bhíonn ar bun idir an Chomhairle, an pobal agus oibrithe deonacha, áit níos fearr chun cónaí agus oibriú ann. Tá mé ríbhródúil as an fhoireann uilig i nDún na nGall, buíoch as an tacaíocht a thugann ár mBaill Thofa dúinn agus as saothar ár bpobal, ár n-oibrithe deonacha agus ár bpáirtithe leasmhara.”
Bíonn Gradaim Uile-Éireann Phobail agus Chomhairle LAMA ar siúl achan bhliain, urraithe ag comhlacht árachais IPB. Tríd na gradaim, léirítear an fhéidearthacht atá ag obair dheonach sa phobal nuair a chothaítear í agus nuair a thacaítear léi.
I measc tograí eile na Comhairle a bhain gearrliostaí amach bhí:
Togra an Civic Dollars sa rannóg don Tionscadal Meabhairshláinte is Fearr; ii Mol Nuálaíochta sa rannóg don Fhiontar & Gnólacht nuathionscanta is Fearr; An Diamant, Baile Dhún na nGall – Scéim do Spás Poiblí Taobh Amuigh sa rannóg don Athnuachan Baile nó Sráidbhaile is Fearr;
Cúirt an Troisc – Eiseamláir de Thithíocht Aoisbháúil sa rannóg don Tithíocht is Fearr & Pleanáil Uirbeach, Cósta Bia Dhún na nGall sa rannóg don Tionscadal Turasóireachta is Fearr, Líonra Leitir Ceanainn sa rannóg don Tionscadal Gaeilge is Fearr.
