Date: 04 Iúil 2025
Aitheantas tugtha do Chlann Uí Bhléine (Blaney) chun 100 bliain de Sheirbhís Leanúnach Polaitiúil ar Chomhairle Chontae Dhún na nGall a cheiliúradh
Thug Comhairle Contae Dhún na nGall aitheantas do Chlann Uí Bhléine ag Ócáid Chathartha a bhí ar siúl tráthnóna Dé hAoine (4 Iúil) in Áras an Chontae, Leifear.
Bronnadh aitheantas ar Chlann Uí Bhléine de bharr a bhfuil bainte amach acu – 100 bliain de sheirbhís leanúnach polaitiúil ar Chomhairle Contae Dhún na nGall. Toghadh Neal Blaney ar Chomhairle Contae Dhún na nGall sa bhliain 1925 agus ó shin i leith, toghadh baill eile den teaghlach ar an Chomhairle; Neil T Blaney, Harry Blaney, Niall Blaney agus Liam Blaney.
Rinne Cathaoirleach Chomhairle Contae Dhún na nGall, an Clr Paul Canning agus Príomh-Fheidhmeannach na Comhailre John G. McLaughlin, cathaoirleacht ar an ócáid.
Ba mhór ag Cathaoirleach Chomhairle Contae Dhún na nGall, an Clr Paul Canning bheith i mbun na hócáide agus dúirt “tá muid ag ceiliúradh éachtaí Chlann Uí Bhléine a thug seirbhís leanúnach ar Chomhairle Contae Dhún na nGall le 100 bliain anuas – ón bhliain 1925 go dtí an lá atá inniu ann. Ní hamháin gur staitistic í seo ach is oidhreacht seirbhíse í d’Fhánaid, do Chontae Dhún na nGall agus do Dháilcheantar Dhún na nGall a bhfuil an pobal, teacht aniar agus leanúnachas fréamhaithe ann.”
Chuir Príomh-Fheidhmeannach Chomhairle Contae Dhún na nGall, John G. McLaughlin an méid seo in iúl, “Trí cheiliúradh a dhéanamh ar an ócáid chathartha seo inniu, a mhol an Clr Coyle, tá muid ag ceiliúradh croí an phobail agus an oidhreacht iontach ionadaíochta a rinneadh agus atá á déanamh thar ceann an phobail ag leibhéal Contae agus Náisiúnta araon. Guím gach rath oraibh le bhur saothar polaitiúil amach anseo.”
Bronnadh scrolla oifigiúil mar chuimhneachán ar an Ócáid Chathartha ar an Clr Liam Blaney agus ar an Seanadóir Niall Blaney thar ceann an teaghlaigh. Ghabh Clann Uí Bhléine buíochas leis an Chomhairle as aitheantas a thabhairt dóibh agus cuireadh sólaistí ar fáil i Seanteach na Cúirte i ndiaidh na hócáide.
