Date: 30 Iúil 2025
#DúnnanGallAbú á cheiliúradh ar an 10 Meán Fómhair 2025
Déanfar ceiliúradh ar #DúnnanGallAbú i mbliana ar an Chéadaoin 10 Meán Fómhair 2025.
Is é seo an séú bliain as a chéile den fheachtas seo a bheith ar siúl agus tá spéis mhór léirithe ann go dtí seo. Tugtar cuireadh do dhaoine as gach cearn den domhan ceangal a chothú le Dún na nGall agus ceiliúradh a dhéanamh ar na rudaí speisialta a bhaineann leis an Chontae — áilleacht tírdhreacha, oidhreacht shaibhir chultúrtha, pobail bheo bhríomhara, an nuálaíocht agus céad mílte fáilte i gcónaí.
Bhí feachtas #DúnnanGallAbú na bliana seo caite ar an cheann ba rathúla go dtí seo. Cothaíodh ceangal le 99 milliún duine ar fud an domhain i gcaitheamh an lae agus suas le 125 milliún duine i gcaitheamh an deireadh seachtaine. Roinneadh na mílte postáil spreagúil, grianghraf álainn, agus scéal pearsanta a léirigh croí an Chontae ar bhonn domhanda, rud a tharraingíonn aird arís agus arís eile ar áilleacht, ar chultúr agus ar spiorad pobail Dhún na nGall. Táthar ag súil tógáil air sin i mbliana agus ceangal a chothú le tuilleadh daoine, cibé áit ar domhan a bhfuil siad.
Beidh #DúnnanGallAbú na bliana seo ar siúl fad is a bheidh TBEX Eorpach 2025 (imeacht do bhlagálaithe taistil ) á reáchtáil i nDún na nGall. Tá sé seo ar cheann de na tionóil is mó ar domhan ina gcruinníonn idir chruthaitheoirí taistil, bhlagálaithe agus tionchairí. Beidh sé ar siúl i nDún na nGall an tseachtain chéanna ina mbeidh an feachtas ar siúl (9-12 Meán Fómhair). Tabharfaidh TBEX deis do lucht cruthaithe scéil ar fud an domhain cuairt a thabhairt ar chladaí an Chontae — is deis iontach í seo le scéal agus stair Dhún na nGall a chur i láthair an domhain mhóir ar ardán idirnáisiúnta.
Tá an tionscadal seo á chomhordú ag Rannóg Forbartha Eacnamaíochta Chomhairle Contae Dhún na nGall agus creideann Cathaoirleach na Comhairle, an Clr. Paul Canning gur deis é an feachtas #DúnnanGallAbú do gach duine a bhfuil a gcroí istigh i nDún na nGall, an fáth a bhfuil sin amhlaidh a chur in iúl trí úsáid a bhaint as #DúnnanGallAbú. Is ceiliúradh bliantúil é seo ina mbíonn muid mórtasach gur as an áit seo dúinn. Nuair a léiríonn daoine na fáthanna a bhfuil a gcroí i nDún na nGall, tá siad ag gríosú daoine eile le cuairt a thabhairt ar an Chontae agus infheistíocht a dhéanamh ann.
Iarrtar ar rannpháirtithe póstálacha a roinnt, macasamhail:
- Áilleacht nádúrtha Dhún na nGall ó Chionn Mhálanna go Sliabh Liag
- Bia, ceardaíocht, cultúr, ceol agus traidisiúin na háite
- Scéalta pearsanta faoi bheith ag éirí aníos, nó ag filleadh nó ag tabhairt cuairte ar Dhún na nGall
- Scéalta faoi ghnólachtaí atá ag éirí leo agus deiseanna cianoibre
- Tograí pobail agus laochra áitiúla a dhéanann difear ceart sa chontae
Is cuid d’iarrachtaí Chomhairle Contae Dhún na nGall le brandáil agus cur chun cinn an chontae a chothú trí Donegal.ie, é #DúnnanGallAbú, rud a chuidíonn le Dún na nGall a chur chun tosaigh mar áit le cónaí ann, le hoibriú ann, le hinfheistíocht a dhéanamh ann agus le spaisteoireacht ann.
Is cuma más duine áitiúil thú, más ball de Diaspóra Dhún na nGall thú nó más duine thú a bhfuil do chroí istigh i nDún na nGall, tugann muid cuireadh duit a bheith rannpháirteach san fheachtas trí ghrianghraif, trí scéalta, trí fhíseáin agus trí theachtaireachtaí a roinnt ar na meáin shóisialta agus trí úsáid a bhaint as na haischlibeanna #DúnnanGallAbú agus #LoveDonegal.
Tá tuilleadh eolais maidir leis an dóigh ar féidir leat a bheith rannpháirteach ann le fáil ar www.donegal.ie/lovedonegal nó lean muid ar na meáin shóisialta @Donegal_ie.
Tagaimís le chéile i mí Mheán Fómhair le ceiliúradh a dhéanamh ar an chontae ar leith atá againn agus léireoidh muid meas agus mórtas dár gcontae féin don saol mór #DúnnanGallAbú
