Date: 28 Iúil 2025
Seoladh Clár Óige PEACEPLUS ar fud an Chontae ar fiú €200,000 é
Seolann Pro Social Ireland agus Comhairle Contae Dhún na nGall Clár Óige PEACEPLUS ar fud an Chontae ar fiú €200,000 é
Seoladh an Clár Crosbhóithre go hoifigiúil i Leitir Ceanainn an tseachtain seo caite. Tá an clár dírithe ar oideachas a chur ar thiománaithe óga agus ar thiománaithe amach anseo faoi shábháilteacht ar bhóithre i nDún na nGall, i nDoire agus i dTír Eoghain. Freastalóidh an tionscnamh nuálach seo ar bhreis is 265 rannpháirtí thar thréimhse dhá bhliain, ag soláthar taithí phraiticiúil dóibh ag obair ar fhíorghluaisteáin, ag múineadh scileanna meicniúla agus coirpeachta, agus ag cur béime ar thábhacht na sábháilteachta ar bhóithre.
Freastalóidh gach seisiún cúig seachtaine den Chlár ar dheichniúr rannpháirtithe óga. Faoi threoir shaineolach na dteagascóirí Denis Ferry, Leslie O'Donnell, agus baill de Pro Social Ireland, foghlaimeoidh na meicneoirí óga faoi ghluaisteáin i ngaráiste lánfheidhmiúil atá lonnaithe i Leitir Ceanainn. Tá an oiread sin éilimh ar an tionscnamh seo go bhfuil an-éileamh ar an Chlár.
Is cuid lárnach de Chlár Tiomána Pro Social Ireland é an Clár Garáiste, a bunaíodh i nDún na nGall in 2012 agus atá leathnaithe go contaetha éagsúla ó shin. Is é sprioc uileghabhálach an Chláir seo oideachas a chur ar dhaoine óga trí dhúshlán a thabhairt dá bpatrúin smaointeoireachta agus don dearcadh atá acu i leith na tiomána cheana féin, agus feasacht níos fearr a chothú ar a n-iompar tiomána.
Tagann an clár seo faoi Théama 2: "Pobail Rathúla agus Síochánta", atá mar chuid de Phlean Gníomhaíochta Áitiúil PEACEPLUS Dhún na nGall. Tá maoiniú €7,635,395.00 á sholáthar sa phlean chun tacú le 32 tionscadal tógála síochána a sheachadadh sa dá bhliain amach romhainn, ó 2025 go 2027.
Ag labhairt dó ag an seoladh, dúirt Cathaoirleach Chomhairle Contae Dhún na nGall, Paul Canning: "Is sampla iontach é an tionscnamh seo den dóigh gur féidir le maoiniú PEACEPLUS athrú dearfach a chur chun cinn inár bpobail. Cuirfidh an clár seo ar chumas na rannpháirtithe óga scileanna luachmhara a fhoghlaim agus cothóidh sé tiomantas láidir do shábháilteacht ar bhóithre. Táimid bródúil as tacú le tionscnaimh ar nós an ‘Clár Crosbhóithre’ a dhéanann fíordhifríocht i saol daoine óga i nDún na nGall agus sna contaetha teorann. Más féidir leis an chlár seo beatha duine óg amháin a shábháil ar ár mbóithre, b'fhiú é."
Dúirt Mick Quinlivan, Cathaoirleach, Pro Social Ireland, "Tá sé mar aidhm ag an Chlár seo daoine óga a theagasc le meas a bheith acu ar ghluaisteáin agus ar an dóigh a n-oibríonn siad agus le meas a bheith acu orthu féin agus ar gach úsáideoir bóithre eile. Is mór an imní é go ndéanann daoine óga gluaisteáin a mhodhnú, spriongaí a ghearradh, agus iad a ísliú, rud atá thar a bheith contúirteach, agus cuireann an Clár seo na fáthanna go bhfuil an cleachtas seo mícheart agus neamhshábháilte, in iúl dóibh. Cuireann an tionscadal seo an spéis atá ag daoine óga i gcarranna sa treo ceart, ag cur oideachas orthu ar shábháilteacht sula mbeidh siad ina mbaol ar na bóithre agus chun beatha daoine a shábháil agus gortú a chosc. Ba mhaith le Pro Social Ireland buíochas a ghabháil le Comhairle Contae Dhún na nGall agus le PEACEPLUS as a dtacaíocht.
Dúirt Denis Ferry, teagascóir ar an Chlár, "Tá sé mar aidhm ag an Chlár Crosbhóithre leas a bhaint as an phaisean atá ag daoine óga do ghluaisteáin, ar bhealach fiúntach. Cuireann sé oideachas orthu faoi shábháilteacht sula dtosaíonn siad ag tiomáint, ag laghdú na rioscaí féideartha agus ag cinntiú nach gcuireann siad beatha daoine i mbaol. Tá an cúrsa seo deartha chun meas ar ghluaisteáin, tuiscint ar an dóigh a n-oibríonn siad, féinmheas, agus meas ar gach úsáideoir bóithre i measc tiománaithe óga, beag beann ar inscne, a chothú. Thar ceann na foirne, ba mhaith linn buíochas a ghabháil leis an Chlár PEACEPLUS as a dtacaíocht don Chlár Crosbhóithre."
Chun tuilleadh eolais a fháil faoin tionscadal, is féidir leat teagmháil a dhéanamh le Pro Social Ireland ag: admin@prosocialireland.ie
Clár Crosbhóithre le tacaíocht ó PEACEPLUS; clár atá á bhainistiú ag Comhlacht na gClár Speisialta AE (SEUPB)
Is féidir leat tuilleadh a léamh faoin chlár PEACEPLUS anseo fosta.
