Date: 27 Meith 2025
Breis agus 200 duine ag ceiliúradh na Bithéagsúlachta agus na Cruthaitheachta i bhfiántas na hInse
Bhí Anaclann Éanlaithe Fiáine na hInse beo le gáire, le foghlaim agus le cruthaitheacht nuair a chruinnigh breis agus 200 duine le chéile don Lá san Fhiántas in Inis, imeacht trasteorann le ceiliúradh a dhéanamh ar an bhithéagsúlacht agus ar an tsamhlaíocht mar chuid de Chruinniú na nÓg ar an Satharn 7 Meitheamh.
Eagraíodh an t-imeacht seo mar chuid den tionscadal Bithéagsúlacht gan Teorainn le tacaíocht ó Éire Ildánach. Is iad Comhairle Contae Dhún na nGall i gcomhar le Comhairle Chathair Dhoire agus Cheantar an tSratha Báin a bhí i mbun an imeachta faoi Chlár Oileán Comhroinnte le Cruinniú na nÓg a cheiliúradh.
Bhain teaghlaigh dúil as an éiceachóras saibhir atá in Anaclann Éanlaithe Fiáine na hInse, faoi stiúir saineolaithe nádúir agus Oifigigh Bhithéagsúlachta na Comhairle. Chuir an aimsir thirim go mór leis an lá fosta.
Bhain idir pháistí agus daoine fásta sult as a bheith ag faire ar na héin le hAengus Kennedy ó Nádúr an Iarthuaiscirt, as feithidí uisce a aimsiú le Frog CIC, agus as bláthanna fiáine agus feithidí a aimsiú le hAnnie Mullan ó Fheirm Butterlope. Ba bhuaicphointe é an cosán bithéagsúlachta, cuid den lúb 8km ina raibh duaiseanna fiáine le buachaint agus málaí féiríní ar fáil do na chéad 30 teaghlach a chláraigh ar an lá.
Reáchtáladh an t-imeacht seo mar chuid de Chruinniú na nÓg, lá náisiúnta na cruthaitheachta in Éirinn ina mbíonn imeachtaí saor in aisce ar siúl do pháistí agus do dhaoine óga. Is iad Foireann Cultúir agus Cruthaitheachta Chomhairle Contae Dhún na nGall a bhí i mbun an imeachta le tacaíocht ó Chomhairle na nÓg i nDún na nGall.
Le haghaidh tuilleadh eolais faoi imeachtaí eile atá beartaithe, caith súil ar donegalculture.ie.
