Date: 11 Márta 2025
Dréacht de Straitéis Athghiniúna & Plean Gníomhaíochta Bhun an Phobail
Tá áthas ar Fhoireann Athghiniúna agus Forbartha Chomhairle Contae Dhún na nGall i gcomhar le Dearadh GM agus a Chomhlaigh a fhógairt go mbeidh tús á chur le comhairliúchán poiblí le tuairimí a fháil ón phobal maidir le Dréacht den Straitéis Athghiniúna & Plean Gníomhaíochta don bhaile. Tá an tionscadal seo á mhaoiniú ag an Roinn Forbartha Tuaithe agus Pobail faoin Scéim Athnuachana Bailte agus Sráidbhailte. Beidh an Dréacht den Straitéis Athghiniúna & Plean Gníomhaíochta ar fáil don phobal ón Déardaoin 20 Márta go dtí 16 Aibreán 2025. Táthar ag moladh don phobal a dtuairimí a thabhairt maidir leis an tionscadal físeach, spreagúil seo a thugann deis do dhaoine lár Bhun an Phobail san am atá le teacht, a shamhlú.
Chuir Cathaoirleach Cheantar Bardais Inis Eoghain fáilte roimh fhoilsiú an Dréachta, “Tá lúcháir orm go mbeidh fáil ag an phobal anois ar an Dréacht de Straitéis Athghiniúna & Plean Gníomhaíochta Bhun an Phobail, chun go bhfaighfí tuilleadh aiseolais ar an Mhórphlean, ar na bearta agus ar na coincheapa atá san áireamh ann. Mholfainn go mór don phobal uilig a bheith páirteach sa phróiseas comhairliúcháin sna 4 seachtaine atá amach romhainn mar go bhfuil sé ríthábhachtach tuairimí ár bpobail agus tuairimí na bpáirtithe leasmhara a fháil chun an fhís seo a mhúnlú do Bhun an Phobail san am atá le teacht.”
Tá an Dréacht den Straitéis Athghiniúna & Plean Gníomhaíochta arna ullmhú ag Dearadh GM agus a Chomhlaigh agus de réir eolas a bailíodh ag an chéad chéim den chomhairliúchán poiblí a reáchtáladh i Meán Fómhair 2024. Dúirt Johnny Stewart ón chomhlacht Dearadh GM agus a Chomhlaigh, “Bhí ról lárnach ag pobal Bhun an Phobail ann go dtí seo ó thaobh an dóigh a ndearnadh an Dréacht den Straitéis Athghiniúna & Plean Gníomhaíochta a mhúnlú agus a fhorbairt agus ba mhaith linn buíochas a ghabháil leofa sin uilig a ghlac páirt ann go dtí seo. Ba mhian linn dá dtabharfadh an méid is mó daoine agus is féidir aiseolas ar an Dréacht den Straitéis Athghiniúna & Plean Gníomhaíochta chun gur féidir linn a chinntiú go bhfuil sé ag teacht le riachtanais agus mianta an phobail, na gcónaitheoirí agus lucht gnó na háite.”
Dúirt Liam Ward, an Stiúrthóir Seirbhíse, Forbartha Pobail & Seirbhísí Pleanála, “Is céim thábhachtach í foilsiú an Dréachta seo do Bhun an Phobail mar go leagfaidh sé amach plean a chuideoidh le forbairt an bhaile amach anseo agus a thacóidh le hiarratais ar mhaoiniú san earnáil phoiblí, phríobháideach agus pobail.” “Tá réimse iontach moltaí mar chuid den Dréacht a chuirfeas le hacmhainní nádúrtha Bhun an Phobail agus le héagsúlacht na háite. Má bhaintear an méid atá beartaithe amach, cuirfidh sé go mór le tábhacht an bhaile agus a mbeidh á thairiscint aige san am atá le teacht.”
Mar chuid den dara céim den chomhairliúchán poiblí, déanfar imeacht buail isteach a reáchtáil ar an Déardaoin 20 Márta idir 3.30in agus 7.30in i Halla Naomh Adhamhnáin, Bun an Phobail. Buail isteach agus bíodh deis labhartha agat leis na sainchomhairleoirí!
Beidh fáil ar an Dréacht de Straitéis Athghiniúna & Plean Gníomhaíochta Bhun an Phobail, ar líne ar shuíomh gréasáin Chomhairle Contae Dhún na nGall ón 20 Márta ag:
Beidh fáil air go poiblí le linn gnáthuaireanta oifige ón Déardaoin 20 Márta go dtí an Chéadaoin 16 Aibreán 2025 ag na háiteanna seo a leanas:
- Ionad Seirbhísí Poiblí Charn Domhnach, An Phríomhshráid, Carn Domhnach.
- An Deasc Fáilte, Comhairle Contae Dhún na nGall, Teach an Chontae, Leifear
Is féidir aighneachtaí nó moltaí a bhaineann leis an Dréacht den Straitéis Athghiniúna & Plean Gníomhaíochta a chur isteach idir an Déardaoin 20 Márta agus an Chéadaoin 16 Aibreán 2025 trí:
- Bheith i láthair ag imeacht buail isteach ar an Déardaoin 20 Márta agus aiseolas a thabhairt;
- Rphost: gmda@g-m-design.co.uk;
- Teileafón: +44 (028) 7035 6138; nó
- Scríobh chuig: Dearadh GM agus a Chomhlaigh, 22 Bóthar an Lóiste, Cúil Raithin, Co. Dhoire, BT52 1NB nó chuig an Fhoireann Athghiniúna agus Forbartha, Comhairle Contae Dhún na nGall, Seanbheairic an Airm, Leifear, Co. Dhún na nGall, F93 PN3H.
