Date: 11 Márta 2025
Léigh DL 25 ag teacht chun críche i nGleann Bheatha - áit a mbeidh an t-údar Stewart Foster
Tiocfaidh deireadh le Léigh DL 2025 ag 11am Déardaoin (13 Márta) i bPáirc Náisiúnta Álainn Ghleann Bheatha, áit a mbeidh Stewart Foster a scríobh leabhar na bliana seo i láthair. Buailfidh sé leis na scoileanna - Scoil Náisiúnta Drumman Ráth Mealtain, Clochar Loreto Leitir Ceanainn agus Scoil Naomh Pádraig do Chailíní, Carn Domhnach, ar éirigh leo deis a fháil siamsaíocht a chur ina láthair. Cuirfidh an t-imeacht seo clabhsúr leis an togra litearthachta pobail agus scoile seo a bhí ar siúl le 6 seachtaine agus ar ghlac 85 duine páirt ann.
Tá aidhm an-simplí ag LÉIGH DL: feasacht agus grá don léitheoireacht a chothú i nDún na nGall. Ag labhairt di roimh an searmanas i nGleann Bheatha, thréaslaigh Cathaoirleach na Comhairle, Niamh Kennedy le coiste LÉIGH DL ar thionscadal eile ar éirigh go maith leis. “Seo an tríú bliain déag do LÉIGH DL agus mar thoradh air, cuireadh breis agus 20,000 leabhar ar fáil i siopaí áitiúla agus i bpobail. Is mar gheall ar chomhoibriú idir an Bord Oideachais agus Oiliúna áitiúil (BOO) agus Ollscoil Teicneolaíochta an Atlantaigh go bhfuil sé seo indéanta. Is éacht thar cuimse é bheith ag tacú le páistí agus le teaghlaigh ó thaobh na léitheoireachta de le deich mbliana anuas, agus tá súil agam go mbeidh tionchar dearfach fadtéarmach aige ar na rannpháirtithe uilig”.
Dúirt Steward Foster, a scríobh leabhar na bliana seo ‘All the things that could go wrong’, gur mhian leis a dhul go Dún na nGall chun an obair atá ar bun ag LÉIGH DL a fheiceáil dó féin. “Tá áthas orm a bheith anseo agus an obair atá ar bun i scoileanna agus i bpobail sa Chontae a fheiceáil. Seo an dara leabhar de mo chuid atá roghnaithe ag LÉIGH DL agus cuireann sé ola ar mo chroí gur roghnaigh siad ceann de mo chuid leabhar arís”.
I mbliana, tá 2,000 leabhar tugtha amach ag LÉIGH DL ar fud Dhún na nGall, rud a chuir áthas ar choiste LÉIGH DL. Bhí Joseph Kelly, Leabharlannaí Feidhmiúcháin agus Comhordaitheoir ar ‘An Ceart chun Léitheoireachta’ le Seirbhís Leabharlainne Chontae Dhún na nGall, thar a bheith sásta leis an éileamh. “Arís, tá spéis mhór léirithe i LÉIGH DL 25. Tá na leabhair go léir tugtha amach do scoileanna, do ghrúpaí agus do theaghlaigh ar fud fad an Chontae. Tá lúcháir orainn leis an fhreagairt, idir sin agus an tionscadal ‘Éire ag Léamh’, tá neart gníomhaíochtaí agus imeachtaí litearthachta ar siúl go háitiúil”.
"Lena chois sin, tá lúcháir orainn arís i mbliana leis an tacaíocht ó Bhord Oideachais agus Oiliúna Dhún na nGall (BOO) agus ó Ollscoil Teicneolaíochta an Atlantaigh (OTA) Leitir Ceanainn; comhpháirtíocht a bhfuil ag éirigh léi agus a chuireann an léitheoireacht chun cinn agus a dhéanann í a spreagadh i measc an phobail uilig. Don dara bliain as a chéile, chuir Coiste áitiúil Seirbhísí do Leanaí agus do Dhaoine Óga (CYPSC) maoiniú ar fáil chun ceardlanna ealaíne agus ceardlanna sa scríbhneoireacht chruthaitheach a reáchtáil leis na scoileanna agus leis na grúpaí a bhí rannpháirteach, i ngach Ceantar Bardais sa Chontae."
"Cé go bhfuil na leabhair go léir atá ar fáil tugtha amach, tá bealaí ann le páirt a ghlacadh ann go fóill, amhail cuairt a thabhairt ar www.donegalculture.ie agus cóipeanna den leabhar a chur in áirithe. Is féidir leat bualadh isteach chuig do bhrainse áitiúil mar go bhfuil siad lán le cóipeanna ar féidir iad a thabhairt ar iasacht".
Fógrófar na buaiteoirí sa scríbhneoireacht chruthaitheach 500 focal ag an searmanas clabhsúir fosta.
I ndiaidh slán a fhágáil le Gleann Bheatha, rachaidh Stewart go Coláiste an Earagail i Leitir Ceanainn, áit a mbeidh seisiún C&F ann le mic léinn agus ina dhiaidh sin beidh sé i mbun ceardlann scríbhneoireachta le foghlaimeoirí, le scríbhneoirí agus le húdair in OTA, Leitir Ceanainn.
Is tionscadal litearthachta ‘Leabhar Amháin, Pobal Amháin’ é LÉIGH DL a bhíonn ar siúl gach earrach. Táimid buíoch as tacaíocht na ngníomhaireachtaí agus na n-oibrithe deonacha uilig atá ar an choiste agus a chuireann an oiread sin dá gcuid ama ar leataobh ar mhaithe le rath agus bláth an tionscadail bliain i ndiaidh bliana.
Chun tuilleadh eolais a fháil faoi LÉIGH DL agus chun súil a chaitheamh ar na leabhair agus na húdair a roghnaíodh roimhe seo, tabhair cuairt ar ár líonraí sóisialta agus www.readdonegal.com
