Date: 07 Beal 2025
Tá Dún na nGall ar Bís fá Sheachtain na Bithéagsúlachta!
Tá Seachtain Náisiúnta na Bithéagsúlachta ar siúl ón 16 – 25 Bealtaine i mbliana, a chuimsíonn Lá Idirnáisiúnta na Bithéagsúlachta ar an 22 Bealtaine agus déantar an tSeachtain a cheiliúradh ar fud na hÉireann agus é mar aidhm aici daoine a nascadh leis an dúlra. Tá go leor siúlóidí agus cainteanna ag tarlú chun seans a thabhairt do dhaoine a ndúil a bhaint as an dúlra agus níos mó a fhoghlaim faoi bhithéagsúlacht ina gceantar féin. Is iad Líonra Comhshaoil na hÉireann (LCÉ) a dhéanann comhordú ar Sheachtain na Bithéagsúlachta agus tá sí á maoiniú ag an tSeirbhís Páirceanna Náisiúnta agus Fiadhúlra (SPNF).
Go háitiúil, tá roinnt imeachtaí de chuid Sheachtain na Bithéagsúlachta á reáchtáil ag Comhairle Contae Dhún na nGall, idir shiúlóidí treoraithe cois na Daoile, ceardlann ID Pailneoirí i mBun Cranncha agus seans le do Chladach a fhiosrú agus foghlaim faoi bhithéagsúlacht na trá i Machaire. Is féidir le daoine an fiadhúlra istoíche a aimsiú ag ceann den iliomad siúlóidí sciathán leathair arna eagrú ag Caomhnú Sciathán Leathair Éireann nó trí bhualadh isteach chuig ceann de na hiliomad gníomhaíochtaí bithéagsúlachta atá ar siúl i bPáirc Náisiúnta Ghleann Bheatha (www.nationalparks.ie/glenveagh/) ag an chéad Fhéile de Sheachtain na Bithéagsúlachta, le tacaíocht ó Oifigí Bithéagsúlachta agus Oidhreachta Chomhairle Contae Dhún na nGall.
Tá Julie Corry, Oifigeach Bithéagsúlachta Chomhairle Contae Dhún na nGall ag moladh do dhaoine dul amach agus sult a bhaint as gach a bhfuil le tairiscint ag bithéagsúlacht Dhún na nGall, “Tá Comhairle Contae Dhún na nGall ar bís fá Sheachtain na Bithéagsúlachta agus tá muid sásta tacú le níos mó siúlóidí, cainteanna agus imeachtaí sa Chontae i mbliana, rud a thugann deis do dhaoine blaiseadh agus sult a bhaint as an bhithéagsúlacht thart timpeall orthu. Tá an-áthas orainn a bheith ag tacú le níos mó imeachtaí bithéagsúlachta i mbliana trí thacaíocht a mhaoiniú ó chlár Phlean Gníomhaíochta Bithéagsúlachta Contae de chuid na Comhairle Oidhreachta agus trí Chiste Gníomhaíochta Bithéagsúlachta Áitiúla SPNF."
Tá sonraí iomlána faoi na himeachtaí go léir atá faoi stiúir nó a dtacaíonn Comhairle Contae Dhún na nGall leo le fáil ar www.donegalculture.ie agus ar shuíomh gréasáin Líonra Comhshaoil na hÉireann do Sheachtain na Bithéagsúlachta ag www.biodiversityweek.ie/. Cuirfear tuilleadh sonraí faoi na himeachtaí go léir in airde ar ár líonraí sóisialta fosta.
Chun tuilleadh eolais a fháil faoi Sheachtain na Bithéagsúlachta i nDún na nGall déan teagmháil le biodiversity@donegalcoco.ie.
