Date: 01 DFómh 2025
An Feachtas Turasóireachta ‘Gan aon deifir, Gan aon mhilleadh, Sin Dún na nGall’ Seolta
Táthar ag moladh do sholáthraithe turasóireachta i nDún na nGall, páirt a ghlacadh san fheachtas nua idirshéasúir atá ag teacht sna sála ar chomhdháil idirnáisiúnta TBEX a bhí ar siúl i nDún na nGall le gairid; inar thug na céadta cruthaitheoir inneachair agus scríbhneoir taistil cuairt ar an chontae dá bharr.
Díríonn an feachtas seo ar an mhargadh intíre agus táthar ag súil go mbeidh daoine a théann ar saoire san fhómhar agus i rith an bhriseadh lár téarma, ag smaoineamh ar chuairt a thabhairt ar Dhún na nGall. Tríd an fheachtas ‘Gan aon deifir, Gan aon mhilleadh, Sin Dún na nGall’, tabharfar léargas ar na nithe is fearr a bhaineann leis an chontae trí fheachtas margaíochta digiteach, trí fhíseáin, agus trí leathanach tairiscintí ar an suíomh gréasáin GoVisitDonegal.com, áit ar féidir le daoine sult a bhaint as réimse eispéireas, as pacáistí óstán agus pacáistí séasúracha.
Is iad foireann Turasóireachta Chomhairle Contae Dhún na nGall atá i mbun an fheachtais i gcomhar le Craobh Dhún na nGall de Chónaidhm Óstán na hÉireann (IHF) agus múnlaithe ag an rannpháirtíocht san earnáil le gairid a dhírigh ar na tacaíochtaí atá riachtanach don idirshéasúr a aithint.
Ag labhairt dó sular seoladh an feachtas, dúirt an Clr. Paul Canning, Cathaoirleach ar Chomhairle Contae Dhún na nGall “tá muid ag glacadh le riachtanais na hearnála turasóireachta trí thacaíocht a chur ar fáil d’fheachtas a chothaíonn cuairt le linn uaireanta seachbhuaice, a thacaíonn le cúrsaí fostaíochta agus a neartaíonn Contae Dhún na nGall mar láthair turasóireachta agus ceann scríbe ó thus deireadh na bliana.
D'aontaigh John McLaughlin, Príomh-Fheidhmeannach Chomhairle Contae Dhún na nGall agus Cathaoirleach ar Thurasóireacht Dhún na nGall leis seo agus dúirt: “is dea-shampla é an feachtas seo de chomhoibriú áitiúil a thacaíonn leis an earnáil turasóireachta. Is am álainn den bhliain é an fómhar le seal a chaitheamh i nDún na nGall, agus tá muid ag súil le fáilte a chur roimh chuairteoirí chun go mbainfidh siad a ndúil as an chontae seo.”
Táthar ag moladh do sholáthraithe turasóireachta tairiscintí idirshéasúir a chur isteach chun go mbeidh siad le feiceáil ar leathanach gréasáin an fheachtais. Beidh an feachtas á chur chun cinn ar na hardáin dhigiteacha sna seachtainí amach romhainn, agus cuifear úsáideoirí ar líne i dtreo an leathanaigh
GoVisitDonegal.com.
Tuilleadh eolais:
https://www.govisitdonegal.com/campaigns
