Date: 09 DFómh 2025
Béim mhór curtha ar Shábháilteacht ar Bhóithre ag Seó Sábháilteachta Bóthair AXA i gcomhpháirtíocht le Comhairle Contae Dhún na nGall
D’fhreastail breis agus 2500 scoláire Idirbhliana agus 5ú bliana ó scoileanna ar fud Dhún na nGall ar ‘Seó Sábháilteachta Bóthair AXA’ i gcomhpháirtíocht le Comhairle Contae Dhún na nGall ar an Mháirt agus ar an Chéadaoin 7 & 8 Deireadh Fómhair in Ionad Fóillíochta Aura, Leitir Ceanainn.
Is imeacht cumhachtach é an Seó Sábháilteachta Bóthair seo, atá ar bun le scoláirí a chur ar an eolas faoi na héifeachtaí tromchúiseacha a d’fhéadfadh a bheith ag timpistí bóthair ar a mbeatha féin agus ar bheatha a gclainne agus a gcairde.
Mar chuid den Seó Bóthair, thug An Garda Síochána, Seirbhís Dóiteáin Dhún na nGall, An tSeirbhís Náisiúnta Otharcharr agus Comhairleoir atá lonnaithe i Rannóg Timpistí agus Éigeandála Otharlann na hOllscoile Leitir Ceanainn cuntais phearsanta a chuaigh i gcion go mór ar an lucht éisteachta. Bhí sé mar aidhm ag na cuntais seo teachtaireacht faoin tábhacht a bhaineann le sábháilteacht ar bhóithre a chur i láthair an lucht éisteachta.
Ar cheann de ghnéithe cumhachtacha an imeachta, bhí scéal Rachel Elliot, bean a tháinig slán as timpiste mharfach. Chuaigh an cur síos macánta a rinne sí i bhfeidhm go mór ar na scoláirí, agus tarraingíodh aird ar na fíorchontúirtí bóthair atá ann do thiománaithe óga.
Gné thar a bheith pearsanta a bhí i gcuid cainte Bernadette Rice ar cailleadh a leathchúpla Clarice go tragóideach i dtimpiste bhóthair. Scéal tochtmhar a bhí ann a chuaigh i bhfeidhm go mór ar an lucht éisteachta fosta.
I ndiaidh na gcainteanna, rinne Seirbhís Dóiteáin Dhún na nGall athléiriú beo ar thimpiste bhóthair ina raibh orthu duine ar bhain gortuithe dóibh, a bhaint as gluaisteán. Thug an fíorléiriú praiticiúil seo léargas ar na fírinní a bhaineann le práinnfhreagairt i gcás na beatha, agus léiríodh an scil agus an réamhchúram atá de dhíth le beatha daoine a shábháil i gcásanna tromchúiseacha den sórt sin.
Thug Príomh-Fheidhmeannach Chomhairle Contae Dhún na nGall, John G. McLaughlin le fios “Is Seó Bóthair é seo a théann i bhfeidhm ar dhaoine agus a bhfuil go leor eolais le fáil ann. Is deis thábhachtach í le daoine óga a ghríosú lena machnamh a dhéanamh ar an dóigh a mbaineann siad féin úsáid as an bhóthar mar thiománaithe, mar phaisinéirí, mar choisithe, agus mar rothaithe. Thig le tiomáint róghasta, tiomáint faoi thionchar an óil agus/nó drugaí, tiomáint chontúirteach agus tiomáint nuair atá aird an tiomanaí dírithe ar rud inteacht eile drochéifeacht a bheith acu ar an tiománaí agus ar dhaoine eile a úsáideann an bóthar. Trí cheangal díreach a chothú le scoláirí, cuireann an Seó Sábháilteachta Bóthair béim arís eile ar an tábhacht a bhaineann le roghanna atá sábháilte agus freagrach a dhéanamh. Gabhaim mo mhíle buíochas leis na cainteoirí. Chuir a gcuid scéalta ar ár gcumas an t-imeacht seo a reáchtáil.”
