Date: 30 Ean 2026
‘Bí Cliste faoi Fhuinneamh’ Seolta chun Cuidiú le Daoine Billí a Laghdú agus Éifeachtacht Fuinnimh a Mhéadú
Le costais fuinnimh ag ardú agus imní faoin timpeallacht ag méadú, tá áthas ar Leabharlann Chontae Dhún na nGall seoladh an treoirleabhráin nua ‘Bí Cliste faoi Fhuinneamh’ a fhógairt. Tá an treoirleabhrán seo scríofa i dteanga shimplí shoiléir agus míníonn sé do dhaoine an dóigh is fearr leis na huirisí i dTrealamh Fuinnimh Baile na leabharlainne a úsáid.
Tá an Trealamh Fuinnimh Baile le fáil ar iasacht don phobal saor ina aisce ó leabharlanna áitiúla ar fud Chontae Dhún na nGall. Tugann an trealamh seo, a bhain duaiseanna amach, deis d’úinéirí tí agus do thionóntaí smacht a ghlacadh ar an úsáid fuinnimh ina dtithe féin, agus d’fhéadfaí billí fuinnimh a laghdú suas le 20%. Tá uirlisí praiticiúla i ngach pacáiste trealaimh a dhíríonn ar phríomhréimsí úsáide fuinnimh, téamh spáis, uisce te agus leictreachas. Tá an trealamh le fáil saor in aisce do bhaill na leabharlainne ar feadh seachtain amháin. Ba chóir do chónaitheoirí a bhfuil suim acu ann dul i dteagmháil lena mbrainse leabharlainne áitiúil nó cuairt a thabhairt ar donegallibrary.ie chun pacáiste trealaimh a chur in áirithe.
Tá eolas sa treoirleabhrán ‘Bí Cliste faoi Fhuinneamh’ fosta ar Ghníomhaireacht Fuinnimh an Iarthuaiscirt (NWEA) de chuid Chomhairle Contae Dhún na nGall. Is siopa aonionaid í an ghníomhaireacht seo a chuireann comhairle agus tacaíocht ar fáil d’úinéirí tí agus gnólachtaí maidir leis an dóigh lena dtithe agus lena bhfoirgnimh a dhéanamh níos éifeachtúla ó thaobh fuinnimh de.
Beidh seoladh an treoirleabhráin ‘Bí Cliste faoi Fhuinneamh’ ar siúl i Leabharlann Phobail Bhun Cranncha ar an Mháirt, 10 Feabhra ag 10.30am, agus leanfar le taispeántas ina dhiaidh mar aon le leideanna praiticiúla faoin dóigh is fearr leis na huirlisí sa phacáiste a úsáid. Tá fáilte roimh gach duine freastal ar an seoladh. Beidh ceardlanna eile ar siúl i leabharlanna i mBéal an Átha Seanaidh - 11 Feabhra ag 3pm, Na Bailte Nasctha - 13 Feabhra ag 11am, Leitir Ceanainn - 19 Feabhra ag 6pm agus Gaoth Dobhair - 4 Márta ag 6pm. Chun tuilleadh eolais a fháil nó le háit a chur in áirithe, cuir glaoch ar 074 9560862 nó seol ríomhphost chuig dmcgeady@donegalcoco.ie.
