Date: 11 Márta 2026
Cuairt an Uachtaráin Catherine Connolly ar Chomhairle Contae Dhún na nGall
Bhí Seomra na Comhairle i gCeannáras Chomhairle Contae Dhún na nGall, Leifear lán go doras maidin Dé Máirt nuair a thug Uachtarán an Stáit, Catherine Connolly cuairt oifigiúil ar Chomhairle Contae Dhún na nGall.
D’eascair an chuairt seo as cuireadh a thug Coiste na Gaeilge, Comhairle Contae Dhún na nGall don Uachtarán chun an chontae ag deireadh na bliana seo a chuaigh thart.
Ina measc siúd a bhí i láthair, bhí Cathaoirleach agus Príomh-Fheidhmeannach na Comhairle Contae, Stiúrthóirí agus baill tofa, baill de Choiste na Gaeilge, oifigigh ó Rannóg na Gaeilge, Ceannasaí Oifig Réigiúnach Údarás na Gaeltachta Michéal Mac Giolla Easbuig, Oifigigh Pleanála Teanga sa chontae, daltaí scoile agus ionadaithe ó ghrúpaí pobail Gaeilge ar fud an chontae.
Chuir Cathaoirleach na Comhairle, an Clr Paul Canning fáilte roimh an Uachtarán chun na Comhairle agus chun an chontae, "Is mór an pléisiúr dom fáilte a chur romhat go Seomra na Comhairle agus go Contae Dhún na nGall. Guím gach rath ort i do thréimhse oifige – éireoidh go geal leat. Is mór agam thar ceann mhuintir Dhún na nGall do chuairt anseo inniu.”
Ag labhairt dó, dúirt Príomh-Fheidhmeannach Chomhairle Contae Dhún na nGall, John G. McLaughlin, "Is mór an onóir dúinn sa Chomhairle go bhfuil tú ar cuairt againn chomh luath seo i do thréimhse oifige. Is contae Gaeltachta muid agus tá a fhios agam go bhfuil an-chion agus an-mheas agat ar an Ghaeilge agus ar na hoileáin. Tá an Chomhairle toilteanach comhoibriú leat le linn do thréimhse mar Uachtarán.”
Ina hóráid, rinne an tUachtarán trácht ar na fadhbanna tromchúiseacha atá sa chontae agus sa domhan i láthair na huaire ach tharraing sí aird ar láidreacht agus teacht aniar an phobail. Thug sí aitheantas do chur chun cinn na Gaeilge sa chontae ach mhaígh sí nach mór í a chaomhnú fosta. “Is ábhar dóchais agus cúis áthais ár dteanga álainn a fheiceáil ag dul ó neart go neart, ní díreach i dTír Chonaill, ach ar fud fad na tíre. Níl aon cheist ach go gcaithfear an Ghaeilge a chothú agus a chaomhnú mar chuid lárnach dár bhféiniúlacht agus dár gcultúr. Déanaimid ár ndícheall ar son na Gaeilge le chéile.” Thug sí gealltanas go bpillfeadh sí ar an chontae arís amach anseo le cuairt a thabhairt ar na ceantair Ghaeltachta agus ar na hoileáin.
Dúirt Cathaoirleach Choiste na Gaeilge, Comhairle Contae Dhún na nGall, an Clr Micheál Choilm Mac Giolla Easbuig go raibh cuairt an Uachtaráin tábhachtach agus gur mhór an choimitmint a léirigh an tUachtarán don chontae le linn a feachtas Uachtaránachta. Thug sé moladh mór do na grúpaí sin a bhí i láthair ó Thoraigh go hÁrainn Mhór, ó Ghleann Cholm Cille go hInis Eoghain, ón Ghaeltacht Láir go dtí an Ghaeltacht Ard agus Gaeltacht an Iarthuaiscirt, atá ag obair lena chinntiú go bhfuil an Ghaeilge beo. Ghabh sé buíochas le Coiste na Gaeilge agus thug aitheantas don fhorbairt a tháinig ar an choiste le blianta beaga anuas. “Ba ghnách linn bualadh i seomra beag dorcha ach d’athraigh muid sin. Thug muid an coiste amach go dtí’n pobal agus sin mar a bheas sé. Ba mhaith liomsa agus leis an Clr Máirtín Ó Scannláin mar Chathaoirleach agus Leas-Chathaoirleach ar an choiste a chinntiú go mbeidh ceangal láidir againn le hÁras an Uachtaráin – leis an Ghaeilge a chur chun tosaigh taobh istigh dár gcoiste agus dár gcontae ina iomláine.”
Labhair Leas-Chathaoirleach Choiste na Gaeilge, an Clr Máirtín Ó Scannláin, faoin bhrú atá ar an Ghaeilge faoi láthair ach mhol sé tiomantas an Uachtaráin i leith na teanga ina cuid oibre “A Uachtaráin, tá a fhios ag achan duine sa seomra seo an brú atá ar an Ghaeilge sa tír seo anois ach tá a fhios againn fosta chomh tábhachtach is atá sé go bhfuil duine cosúil leat féin san Áras, a chuireann an Ghaeilge chun tosaigh in achan rud a dhéanann tú.”
Bhronn an Chomhairle leabhar le grianghraif dhaite agus ceann le grianghraif dhubha agus bhána de radharcanna i nDún na nGall chomh maith le bróiste, ar an Uachtarán. Cheol Clíona Ní Ghallachóir leagan den amhrán ‘An Mhaighdean Mhara’ agus rinne sí féin agus Róise Ní Laifeartaigh dhá bhréidín ó chomhlacht bréidín McNutts, Na Dúnaibh, a bhronnadh ar an Uachtarán thar ceann Choiste na Gaeilge.
