Date: 29 Ean 2025
Bunú Grúpa Comhordaithe Áitiúil i nDún na nGall agus Bunú Moil Éigeandála Pobalbhunaithe ar fud an Chontae
Cuireadh de chúram ag Oifig an Taoisigh ar Chomhairle Contae Dhún na nGall Grúpa Comhordaithe Áitiúil a bhunú sa Chontae chun aghaidh a thabhairt ar riachtanais na ndaoine is leochailí inár bPobail atá go fóill gan cumhacht leictreachais agus soláthar uisce i ndiaidh Stoirm Éowyn.
Tháinig an Grúpa Comhordaithe Áitiúil le chéile Dé Luain 27 Eanáir, agus arís Dé Máirt 28 Eanáir. Tá ionadaithe ó na príomhghníomhaireachtaí leasmhara ar fad sa chontae sa Ghrúpa seo, chomh maith le Cuideachtaí Comhpháirtíochta Áitiúla, an Earnáil Phobail agus Dheonach, ionadaithe ó Sheirbhísí Óige chomh maith le seirbhísí do Dhaoine Scothaosta.
Áirítear ar na Grúpaí an Chomhairle, BSL, Uisce Éireann, an Roinn Coimirce Sóisialaí, FSS, Gardaí, Cosaint Shibhialta, ALONE i measc go leor leor eile.
Tá Líne Chabhrach Tacaíochta Pobail bunaithe ag an Chomhairle fosta - 1800 832 015 ó 9.00am go 4.30pm an tseachtain seo. Thig leis an phobal teagmháil a dhéanamh linn fosta ar
ár seoladh r-phoist tacaíochta faoi leith ar humanitarianassistance@donegalcoco.ie
Chomh maith leis an mhéid thuasluaite, iarradh ar an Chomhairle tacaíocht a thabhairt do Phobail áitiúla, do Chlubanna Spóirt agus do ghrúpaí eile, atá sásta a n-áitreabh a oscailt chun seirbhísí riachtanacha a sholáthar ag an am seo do bhaill a bpobail a bhfuil gá acu leo.
Áirítear ar na seirbhísí seo Áiseanna Luchtaithe Teileafóin agus TF, Cithfholcadáin, Áiseanna Cócaireachta agus Áiseanna Níocháin.
Tá cuidiú thar na bearta faighte ó ghrúpaí ar fud an chontae go dtí seo. Agus é seo á scríobh, tá 38 ionad pobail againn a thug freagra dearfach ar an iarratas seo agus a n-áiseanna curtha ar fáil acu, agus tá méadú ag teacht ar an líon seo t-am ar fad.
Tá Léarscáil idirghníomhach foilsithe ag an Chomhairle ar ár Láithreán Gréasáin (www.donegalcoco.ie) ar a bhfuil sonraí faoi na hIonaid, amanna oscailte agus áiseanna atá ar fáil, agus mar sin de.
Thig teacht ar an Léarscáil anseo
Tá liosta iomlán na n-ionad leagtha amach sa tábla atá ceangailte leis seo
Beidh liosta na n-ionad seo á uasdátú ag an Chomhairle Contae de réir mar atá tuilleadh sonraí ar fáil.
Tiocfaidh an Grúpa Comhordaithe Áitiúil le chéile arís tráthnóna Déardaoin chun an cás a mheas ag an am sin agus muid ag druidim leis an deireadh seachtaine.
