Date: 31 Márta 2025
Bí faoi dhraíocht ag Cabaret Idirchultúrtha in Amharclann an Ghrianáin
Tá oíche lán le ceol, le filíocht agus le scéalaíocht geallta ag Cabaret Idirchultúrtha a bheas ar siúl in Amharclann an Ghrianáin ar an Aoine 28 Márta idir 7in agus 9in. Tá an ócáid seo á reáchtáil ag Seirbhís Ealaíne Dhún na nGall.
Is é Dagogo Hart, file, drámadóir agus taibheoir iomráiteach, príomh-mhír na hoíche. Chuir sé lucht féachana ar fud na hÉireann agus níos faide i gcéin faoi dhraíocht lena chuid saothair go dtí seo. Mar chuid dá chuid léirithe bríomhara, cíorann sé téamaí cosúil le féiniúlacht, oidhreacht agus ceangal cultúrtha, rud a chiallaíonn go bhfuil gné phearsanta agus dhomhanda lena chuid oibre.
Lena chois sin, beidh léirithe spleodracha ann ón Phobal Indiach i Leitir Ceanainn, ó Anne Omodara, ó Nasya Igelige agus ón cheoltóir mór la rá a bhfuil duaiseanna bainte aici, sin í Theresa Kavanagh. Beidh aoi speisialta léi ar an oíche agus cuirfidh siad beirt éagsúlacht a gcuid ealaíontachta agus scéalaíochta i láthair ar an ardán. Beidh Anda Luma ina bean an tí agus cothóidh sí atmaisféar beo bríomhar ar an oíche fosta.
Tá an ócáid seo saor in aisce a bhuíochas don tacaíocht a fhaightear ó Éire Ildánach, a chuireann an deis iontach ar fáil le saibhreas na n-ealaíon idirchultúrtha i nDún na nGall a cheiliúradh. Tá fáilte romhat a theacht agus tú féin a thumadh sa chruthaitheacht agus a bheith páirteach san oíche speisialta seo!
Tá an tionscadal seo arna thacú ag Éire Ildánach agus ag Comhairle Contae Dhún na nGall.
