Date: 18 MFómh 2025
Wainfest 2025 Seolta i bPáirc Náisiúnta Ghleann Bheatha
Seoladh Wainfest, féile bhliantúil ealaíon agus leabhar do leanaí Dhún na nGall a bhfuil an-tóir uirthi, go hoifigiúil inniu i bPáirc Náisiúnta Ghleann Bheatha leis an téama spreagúil 'Do Ghlór, Do Rogha'. Cuireann téama na bliana seo peirspictíochtaí leanaí i gcroílár na féile, rud a chuireann ar a gcumas a gcuid smaointe, tuairimí agus cruthaitheachta a roinnt i dtimpeallacht thacúil spreagúil.
Beidh an fhéile ar siúl ón 4-12 Deireadh Fómhair, agus geallann Wainfest 2025 go mbeidh ceiliúradh bríomhar ar chruthaitheacht, ar shamhlaíocht, agus ar an tábhacht a bhaineann le héisteacht le guthanna óga, i gceist. Beidh os cionn 100 imeacht saor in aisce ar siúl ar fud Dhún na nGall do scoileanna agus do theaghlaigh, chomh maith le clár ar líne; tá rud éigin ann ar féidir le gach duine taitneamh a bhaint as.
Anois ina 29ú bliain, tá Wainfest ina bhunchloch den saol cultúrtha sa chontae, ag tabhairt deis do leanaí dul i ngleic le scéalta, le ceol, le hamharclannaíocht, le healaín, le damhsa agus le go leor ceardlann idirghníomhach.
Ag labhairt di ag an seoladh, mhol an Leabharlannaí Feidhmiúcháin, Sinéad McLaughlin, téama fhéile na bliana seo, agus dúirt sí: “Is éard a bhí i gceist le Wainfest i gcónaí ná samhlaíocht a spreagadh agus spás a thabhairt do dhaoine óga le páirt a ghlacadh ann. I mbliana, in éineacht le 'Do Ghlór, Do Rogha', táimid ag déanamh níos mó leis an tiomantas sin a chur chun cinn, ag cinntiú go bhfuil a fhios ag leanaí caidé is ábhar do ghuthanna ann, rud a ligeann dóibh a smaointe a roinnt, iad féin a chur in iúl gan aon bhac agus mothú go gcluintear iad.
Lena chois sin, thug sí aitheantas d'obair Sheirbhís Leabharlainne Chontae Dhún na nGall as seirbhís saor in aisce agus inrochtana a chur ar fáil d’achan duine, ag cur béime ar an méid seo a leanas: "Cuireann Leabharlanna eolas, rochtain ar an idirlíon agus siamsaíocht ar fáil tríd an iliomad leabhar agus tríd na cláir éagsúla, chomh maith le hacmhainní eile gan áireamh a bheadh doiligh a aimsiú nó íoc astu."
I measc buaicphointí Wainfest na bliana seo beidh:
· Scéalaíocht agus Imeachtaí Údar – Deis do léitheoirí óga bualadh le cuid de na scríbhneoirí agus de na maisitheoirí is mó a bhfuil meas orthu in Éirinn.
· Ceardlanna Cruthaitheacha – Uirlisí a thabhairt do leanaí chun go mbeidh siad in ann dul i ngleic lena gcuid scéalta, guthanna agus buanna ealaíne féin.
· Léirithe Beo – Ó dhamhsa go ceol, chun lucht féachana óg a spreagadh chun cruthaitheachta.
· Imeachtaí atá fóirsteanach don Teaghlach – Gníomhaíochtaí atá deartha chun leanaí, tuismitheoirí agus pobail a thabhairt le chéile.
Tar éis an tseolta, fuair scoileanna cóip leictreonach den bhróisiúr agus is féidir le teaghlaigh amharc ar chlár iomlán na n-imeachtaí atá beartaithe trí bhróisiúr a phiocadh suas ina leabharlann nó ina n-ionad cultúrtha áitiúil. Tá an clár ar fáil ar ár suíomh gréasáin fosta www.wainfest.ie
