Date: 12 Márta 2026
Ambasadóir na Polainne ar cuairt go Comhairle Contae Dhún na nGall
Ón 1 Iúil go dtí an 31 Nollaig 2026, glacfaidh Éire Uachtaránacht Chomhairle an Aontais Eorpaigh (AE), ról ceannaireachta lárnach i gcroílár chinnteoireacht an AE. Ar feadh sé mhí, déanfaidh Éire stiúradh ar idirbheartaíocht agus comhaontuithe idir na Ballstáit agus tabharfaidh an tír cuidiú dlíthe agus beartais an AE a chur i ngníomh a théann i bhfeidhm ar shaol laethúil níos mó ná 450 milliún duine.
Mar pháirt d’Uachtaránacht AE na hÉireann, beidh gach contae i bPoblacht na hÉireann péireáilte le Ballstát AE le linn na hUachtaránachta, rud a chruthóidh deiseanna chun naisc bhuana áitiúla a thógáil ar fud na hEorpa agus chun naisc phobail a neartú.
Tá Dún na nGall péireáilte leis an Pholainn don tréimhse seo.
Mar ullmhúchán don phéireáil seo, chuir ionadaithe ó Chomhairle Contae Dhún na nGall – an Cathaoirleach, Paul Canning; John G McLaughlin, Príomhfheidhmeannach; Richard Gibson, Stiúrthóir Airgeadais, Seirbhísí Corparáideacha agus Córais Faisnéise, agus baill foirne – fáilte roimh an toscaireacht Pholannach go Dún na nGall: Artur Michalski, Aire Lánchumhachtach, Chargé d’affaires a.i. de Phoblacht na Polainne in Éirinn; Piotr Erenfeicht, Aire-Comhairleoir, Ceannasaí an Rannáin Pholaitiúil agus Eacnamaíoch; agus Agnieszka Skolimowska, Comhairleoir, Ceannasaí Rannán na Taidhleoireachta Poiblí agus Cultúrtha.
Phléigh na páirtithe spriocanna na comhpháirtíochta, is iad sin naisc chultúrtha, ghnó agus phobail a neartú idir na comhpháirtithe. Moltar raon leathan d’imeachtaí poiblí agus comhráite a chur san áireamh chun na cuspóirí seo a bhaint amach le linn thréimhse na comhpháirtíochta.
Tá an dá pháirtí ag súil go mbeidh siad ábalta comhpháirtíocht rathúil bhuan a chruthú a bheidh tairbheach don dá réigiún.
