Gairdín na gCéadfaí nua seolta ag Seirbhís Leabharlainne Dhún na nGall chun folláine agus cuimsiú a chur chun cinn

Cultúr

Gairdín na gCéadfaí nua seolta ag Seirbhís Leabharlainne Dhún na nGall chun folláine agus cuimsiú a chur chun cinn

Tá áthas ar Leabharlanna Dhún na nGall a fhógairt gur osclaíodh Gairdín na gCéadfaí nua ag Leabharlann Bhun Dobhráin go hoifigiúil ar an Luan 12 Bealtaine 2025. Rinne Cathaoirleach Chomhairle Contae Dhún na nGall an Clr. Niamh Kennedy an gairdín a oscailt go hoifigiúil.  Beidh an gairdín nua ina spás fáilteach, deartha chun tacú le riachtanais chéadfacha de gach aois agus cumas.

Suite ar thailte na leabharlainne tá meascán de dhromchlaí tadhlacha, de phlandaí cumhra mar aon le spreagthaí amhairc agus fuaime i nGairdín na gCéadfaí.

Cuireann an gairdín timpeallacht shábháilte agus shíochánta ar fáil do pháistí a bhfuil riachtanais bhreise acu, do dhaoine a bhfuil dúshláin phróiseála a bhaineann leis na céadfaí acu agus d'aon duine a bhfuil spás suaimhneach á lorg acu chun meabhrú agus lena scríste a dhéanamh.

Is éard atá i gceist leis an ghairdín ná spás a chruthú ina mothaíonn gach duine go bhfuil fáilte rompu ann agus go bhfuiltear ag tacú leo. Is síneadh nádúrtha é seo ar na seirbhísí cuimsitheacha a bhfuil sé mar aidhm againn iad a sholáthar gach lá.

Ag labhairt di ag an Seoladh dúirt an Comhairleoir Kennedy 'Is é an sprioc uileghabhálach atá leis an ghairdín ná go mbeidh suaimhneas, sábháilteacht, neamhspleáchas agus aiseag sláinte le fáil ann. Lena chois sin, chun a chinntiú go ndéantar freastal ar gach duine agus níos tábhachtaí ná sin, cosúil lenár leabharlanna féin - go bhfuil fáilte roimh gach duine i gcónaí beag beann ar aois nó ar chumas. Tá teacht ag daoine ar na seirbhísí seo, tá siad á n-úsáid agus tá an spás leabharlainne níos inrochtana agus níos cuimsithí. Tá spás sábháilte agus sultmhar curtha ar fáil anois do chách.'

Tá an tionscadal ag teacht le tiomantas leanúnach Sheirbhís Leabharlainne Dhún na nGall le seirbhísí céadfacha a fhorbairt agus a chur ar fáil i mbrainsí éagsúla ar fud an chontae. Ina measc seo tá spásanna céadfacha, boscaí solais, imeachtaí atá oiriúnach don uathachas agus am suaimhnis sa leabharlann. Tá sé mar aidhm againn go mbeadh an leabharlann ina spás fáilteach agus inrochtana do gach ball den phobal.

Is iad an Roinn Forbartha Tuaithe agus Pobail a mhaoinigh an tionscadal seo faoin Chiste Aitheantais Pobail.

To save this webpage as a PDF, select ‘Save as PDF’ from the Destination drop down and save.