Coróinvíreas COVID-19 Nuacht is déanaí 18 Márta

Tá Comhairle Contae Dhún na nGall ar a seacht ndícheall leanúint ar aghaidh lena seirbhísí poiblí ar dhóigh eagraithe agus muid ag obair fríd na dúshláin a bhaineann le COVID-19.  Tá cuid mhór freagrachtaí ag an Chomhairle, mar fhostóir suntasach, dá cuid oibrithe agus dá cuid custaiméirí agus don phobal ar a bhfuil sí ag freastal.  Sa chomhthéacs seo, tá oifigigh chuí ag bualadh le chéile go minic lena chinntiú go bhfuil an Chomhairle ullamh don dúshlán atá romhainn.  Lena chois sin, buaileann Foireann Bhainistíochta Ghéarchéime COVID-19 le chéile gach lá le plé a dhéanamh ar an chomhairle is fearr ó na saineolaithe leighis, ó chomhlachtaí náisiúnta agus ón rialtas.  Agus é ag caint leis an tír aréir, leag an Taoiseach béim ar na dúshláin atá romhainn, na céimeanna a chaithfidh muid uilig a ghlacadh, agus na hiarrachtaí atá de dhíth ó na seirbhísí poiblí sa tréimhse amach romhainn.  Mar sheirbhís phoiblí, tá dualgas orainn aire a thabhairt don tsochaí agus don phobal ag an am seo, agus déanfaidh muid seo le stuaim agus le cúram.

Mar a fógraíodh daoibh an tseachtain seo caite, tá a cuid leabharlann ar fud an chontae, chomh maiith leis an Iarsmalann agus na Seirbhísí Cultúrtha Réigiúnacha i Leitir Ceanainn, druidte ag an Chomhairle don phobal.  Lena chois sin, tá clóis súgartha na Comhairle ar fud an chontae druidte, agus tuigeann muid go rímhaith an tionchar a bhíonn aige sin san am i láthair ar theaghlaigh a bhfuil páistí óga acu. Mar sin féin, druideadh iad ar mhaithe leis na páistí agus na tuismitheoirí, a d’fhéadfaí iad a úsáid, a chosaint.  Tá muid go fóill ag glacadh leis an chomhairle is fearr ó na saineolaithe leighis agus ó na heagrais náisiúnta i dtaca leis sin.

Ag an am seo, tá áiseanna uilig na Comhairle, seachas iad siúd atá luaite thuas, ar oscailt don phobal le linn gnáthuaireanta oibre.

Tá roinnt prótacál i bhfeidhm do bhaill foirne agus do chustaiméirí mar seo a leanas:

1. Moltar go láidir do chustaiméirí plé leis an Chomhairle ar an ghuthán, ríomhphost, suíomh idirlín nó aon mhodh leictreonach eile an oiread agus is féidir.    San áireamh leis seo tá íocaíochtaí leictreonacha, seachas a bheith ag teacht chuig oifigí airgid s’againn;
2. Aon chustaiméir a thagann chuig ár gcuid ionad agus oifigí, beidh muid ag dréim go gcloífidh siad le rialacha maidir le glanadh láimhe agus scaradh sóisialta, agus gach treoir a thugann baill foirne a leanúint;
3. Thig le custaiméirí, ar theacht isteach chugainn dóibh, a bheith ag dréim le roinnt ceisteanna bunúsacha, mar shampla, an bhfuil ardú teochta orthu, an bhfuil casacht orthu, nó an bhfuil aon chomhartha sóirt eile orthu a ghabhann leis an víreas COVID-19.  Aon chustaiméir a bhfuil na comharthaí sóirt sin orthu, iarrfar orthu a gcuid sonraí agus páipéarachais a fháil i gclúdach/i bpúitse séalaithe sa bhosca atá ar fáil agus pléifear leis i ndiaidh 72 uair an chloig nuair atá an baol dulta i léig.  Chomh maith leis sin, iarrfar ar na custaiméirí sin pilleadh ar a gcarr agus plé lena gcás ar an ghuthán nó ar ríomhaire.

Custaiméirí eile nach bhfuil aon chomhartha sóirt orthu, tabharfar treoracha dóibh faoin dóigh le seasamh i líne agus a bheith scartha ó dhaoine eile de réir mar a bhogann siad i dtreo an chuntair phoiblí.  Is féidir go síneoidh na scuainí go dtí an taobh amuigh de na foirgnimh, agus ba chóir do chustaiméirí a bheith ullamh chun seasamh i scuaine taobh amuigh i ndrochaimsir agus a bheith gléasta fána choinne.

1. Tá ardú feicthe ag an Chomhairle sa líon custaiméirí a thagann isteach chuig oifigí mótarchánach.  Tá seirbhís an-mhaith mótarchánach ar fáil ar líne agus úsáidtear í seo go forleathan ar fud na tíre, agus leoga úsáideann a lán daoine i nDún na nGall í.  Nuair is féidir, moltar go láidir do chustaiméirí an córas idirlín seo a úsáid, agus is féidir le custaiméirí cuidiú a fháil trí scairt a chur ar an Chomhairle, labhairt le cara nó le duine muinteartha atá eolach ar an chóras, nó dul chuig  www.motortax.ie
2. Déanfaidh an Chomhairle socruithe speisialta do chustaiméirí a bhfuil riachtanais eisceachtúla acu ag an am seo, nó a bhfuil éigeandáil éigin acu.  Is fearr é seo a shocrú linn trí scairt ghutháin a chur orainn.
3. Nuair a thagann grúpaí daoine chuig ár gcuid oifigí agus gan ach duine amháin acu ag cuartú seirbhíse, ní bheidh cead ach ag duine amháin teacht chun tosaigh a fhad leis an chuntar phoiblí.    Iarrfar ar na daoine eile sa ghrúpa fanacht taobh amuigh.

Is féidir go ndéanfar na socruithe seo a mhaolú, nó a ghéarú, faoi ghearrfhógra agus beidh na baill foirne ag an doras isteach chuig ár gcuid oifigí ag leanúint na rialacha is déanaí.    Leanfaidh an Chomhairle ag monatóireacht, ag athbhreithniú agus ag athrú a cuid socruithe le seirbhís a sholáthar don phobal de réir mar a thagann níos mó eolais chun cinn.

Iarrann an Chomhairle ar an phobal i gcoitinne, agus gabhaimid buíochas leo, as a gcomhoibriú leis na rialacha atá i bhfeidhm maidir le rochtain a fháil ar ár gcuid seirbhísí ag an am iontach dúshlánach seo.  Tá súil agam go gcuideoidh sé lenár mbaill foirne agus lenár gcustaiméirí araon, agus mar phobal le chéile tabharfaidh muid aire dá chéile chun cuidiú lena chéile teacht fríd an phaindéim seo chomh maith agus is féidir linn.